Prezident İlham Əliyevin Pekində Azərbaycan Çayı ilə Bağlı Maraqlı Dialoqu
Azərbaycan Prezidenti İlham Əliyev Çində CGTN (China Global Television Network) telekanalına verdiyi müsahibə zamanı Azərbaycan çayı barədə aparıcı ilə maraqlı bir dialoq aparıb.
Müsahibə zamanı aparıcı susadığını bildirib və yanlarında olan çaya işarə edib. İlham Əliyev isə bunun Azərbaycan milli çay stəkanı ilə təqdim olunduğunu qeyd edib. Prezident bildirib ki, bu armud formalı stəkanın dizaynı çayın isti qalması üçün nəzərdə tutulub.
Aparıcı Azərbaycan çayını ilk dəfə dadmaqdan məmnun olduğunu deyib və stəkan formasının çayın dadını daha da gözəlləşdirdiyini vurğulayıb. Söhbət zamanı həmçinin Çin və Azərbaycanın çay mədəniyyəti arasındakı oxşarlıqlara toxunulub.
Prezident İlham Əliyev müsahibədə, həmçinin, Çin və Azərbaycan arasında turizm əlaqələrinin inkişaf etdiyini və Çin vətəndaşları üçün vizasız rejimin tam tətbiq olunduğunu bildirib.
Dialoq zamanı aparıcı Azərbaycan məhsullarının — çay və mineral suyun (İstisu) keyfiyyətindən də bəhs edib. İlham Əliyev İstisu mineral suyunun sağlamlıq üçün çox faydalı olduğunu bildirib.
Çin ilə Azərbaycan arasındakı ticarət əlaqələrinin də sürətlə inkişaf etdiyini qeyd edən Prezident İlham Əliyev vurğulayıb ki, Çin artıq Azərbaycanın 4 ən böyük ticarət tərəfdaşından biridir.
