İranın Bəndər Abbas Şəhərində Partlayış: Yaralıların Sayı 516-ya Çatıb
İranın Bəndər Abbas şəhərində yerləşən Şəhid Rəcai limanında baş verən güclü partlayış nəticəsində yaralananların sayı 516 nəfərə çatıb. Bu barədə məlumatı İranın təcili tibbi yardım xidmətinin nümayəndəsi Babok Yektaparast verib.
Əvvəlki saatlarda yayılan xəbərlərə görə, yaralıların sayı mərhələli şəkildə artaraq əvvəlcə 47, sonra 80, 281 və 406 nəfərə çatmışdı. Ən son məlumatlara əsasən, yaralı sayı 516 nəfər olaraq təsdiqlənib.
İlkin məlumatlara görə, partlayış təhlükəli yüklər və kimyəvi maddələrin saxlandığı anbarda baş verib. Partlayışın dəqiq səbəbləri hələ araşdırılır. Bəndər Abbas şəhərinin gömrük idarəsindən verilən açıqlamada, hadisənin baş verdiyi liman sahəsində işin dayandırıldığı bildirilib.
Qeyd edək ki, xəsarət alanlardan bir çoxu Hörmüzqan əyalətinin xəstəxanalarına yerləşdirilib. Ölənlərin olub-olmaması barədə hələ də rəsmi təsdiq gəlməyib, lakin yerli hakimiyyət orqanları ölüm hallarının baş verə biləcəyini istisna etmirlər.
