Rusiya Ukraynaya Gecə Hücumu Təşkil Etdi: Çernovtsı və Lvovda İtkilər Var
Rusiya qoşunları iyulun 12-nə keçən gecə Ukraynaya kamikadze PUA və raketlərlə hücum edib. Çernovtsı və Lvov vilayətlərində ölən və yaralananlar var, yaşayış binaları zədələnib.
İyulun 12-nə keçən gecə Rusiya Silahlı Qüvvələri Ukrayna ərazisinə kamikadze pilotsuz uçuş aparatları (PUA) və qanadlı raketlərdən istifadə etməklə genişmiqyaslı hücum təşkil edib.
“Report” Ukrayna KİV-ə istinadən xəbər verir ki, hücumun əsas episentrlərindən biri Çernovtsı vilayəti olub. Rəsmi məlumatlara görə, bölgəyə dörd ədəd “Şahed” tipli kamikadze PUA və bir qanadlı raket atılıb.
Zərbələr nəticəsində bölgədə 3 fərqli ünvanda yanğın baş verib, lakin yanğınlar artıq söndürülüb. İnzibati binalara, yaşayış evlərinə, iki istifadəsiz binaya və avtomobillərə ciddi ziyan dəyib. Rəsmi məlumata əsasən, hücum nəticəsində 2 nəfər həyatını itirib, 4 nəfər ağır, 10 nəfər isə yüngül xəsarət alıb.
Lvov şəhərində də ciddi dağıntılar qeydə alınıb. Lvov Politexnik Milli Universitetinin 3 binası raket zərbələri nəticəsində zədələnib. Ən böyük ziyan Jeleznodorojnı və Qalitski rayonlarında müşahidə olunub. Burada:
-
46 yaşayış binası zədələnib,
-
500-dən çox pəncərə sınıb,
-
15 mənzil yaşayış üçün yararsız vəziyyətə düşüb.
Bundan əlavə:
-
20 avtomobil,
-
Şəhər məhkəməsinin binası,
-
20 kiçik və orta sahibkarlıq obyektinə də ziyan dəyib.
Lvovda 1 nəfər yaralanıb, onun vəziyyəti sabit qiymətləndirilir və hazırda xəstəxanada müalicə alır.
