Azərbaycan Mədəniyyət Mərkəzi və Özbəkistan Rəssamlıq Akademiyası arasında əməkdaşlıq memorandumu imzalanıb
Azərbaycan Mədəniyyət Mərkəzi ilə Özbəkistan Rəssamlıq Akademiyası arasında təsviri və tətbiqi sənət sahəsində əməkdaşlıq memorandumu imzalanıb. Bu barədə məlumatı Özbəkistandakı Heydər Əliyev adına Azərbaycan Mədəniyyət Mərkəzi yayıb.
Memorandum, Özbəkistan Prezidenti Şavkat Mirziyoyevin 2025-ci ili “Ətraf mühitin mühafizəsi və yaşıl iqtisadiyyat ili” elan etməsi ilə əlaqədar keçirilən Beynəlxalq Təsviri və Tətbiqi Sənət Festivalı çərçivəsində imzalanıb. Festivalın əsas məqsədi mədəni irsin qorunması və gənc istedadların dəstəklənməsi, həmçinin beynəlxalq mədəni əməkdaşlığın gücləndirilməsidir.
Memorandumu Azərbaycan Mədəniyyət Mərkəzinin direktoru Akif Marifli və Özbəkistan Rəssamlıq Akademiyasının sədri Akmal Nur imzalayıblar.
Əməkdaşlığın əsas istiqamətləri:
-
İki ölkə arasında təsviri və tətbiqi sənət sahəsində təcrübə mübadiləsi
-
Milli mədəni irsin qorunması və təbliği üzrə ortaq layihələrin həyata keçirilməsi
-
Rəssamlar, heykəltəraşlar və sənət nümayəndələri üçün ustad dərsləri, seminar və təlim proqramları
-
Gənc rəssamlar üçün sərgilər, müsabiqələr və təqaüd proqramları
-
Hər iki ölkənin incəsənət xadimlərinin iştirak etdiyi birgə sərgilər və tədbirlər
Bu əməkdaşlıq Azərbaycan və Özbəkistan arasında mədəni əlaqələrin inkişafına və gələcəkdə daha genişmiqyaslı layihələrin həyata keçirilməsinə zəmin yaradacaq.
