Qırğızıstan Azərbaycan və Ermənistan arasında sülh sazişi üçün vasitəçi olmağa hazırdır
Qırğızıstan Ermənistan və Azərbaycan arasında davam edən sülh prosesinə dəstək verməyə və sülh sazişinin imzalanması üçün neytral platforma təqdim etməyə hazır olduğunu bəyan edib.
Bu barədə Qırğızıstan parlamentinin sədri Nurlanbek Turqunbek İrəvanda keçirilən danışıqlar zamanı bildirib. O, Ermənistan parlamentinin sədri Alen Simonyan ilə görüşündə qeyd edib ki, Qırğızıstan regionda sabitlik və davamlı sülhün bərqərar olunmasına maraqlıdır:
“Qırğızıstan Ermənistan və Azərbaycan arasında sülh sazişinin imzalanması üçün platforma təqdim etməyə hazırdır”, – deyə Nurlanbek Turqunbek vurğulayıb.
Qeyd edək ki, Nurlanbek Turqunbek İrəvanda keçirilən “Yerevan Dialogue” beynəlxalq konfransında iştirak edir. Bu tədbir regional dialoqun və əməkdaşlığın gücləndirilməsinə xidmət edən mühüm platformalardan biri hesab olunur.
Qırğızıstanın bu təşəbbüsü Cənubi Qafqazda sülhün təmin olunmasına yönəlmiş beynəlxalq səylərin bir hissəsi kimi qiymətləndirilir. Siyasi müşahidəçilər bu cür təkliflərin tərəflər arasında etimadın bərpa olunmasında mühüm rol oynaya biləcəyini bildirirlər.
