Paşinyan: Ermənistan və Azərbaycan arasında sülh sazişi çox yaxındır
Ermənistan və Azərbaycan arasında sülh sazişinin imzalanması ilə bağlı məsləhətləşmələr davam edir.
Bu barədə Ermənistanın baş naziri Nikol Paşinyan İrəvanda Slovakiyanın baş naziri Robert Fitso ilə keçirdiyi birgə brifinq zamanı açıqlama verib. O bildirib ki, sülh sazişinin imzalanması çox yaxın görünür və Ermənistan bu istiqamətdə öhdəliklərini tam şəkildə yerinə yetirməyə hazırdır.
“Ümid edirəm ki, bugünkü məruzəm zamanı Ermənistan və Azərbaycan arasında sülhün nə qədər yaxın olduğunu beynəlxalq tərəfdaşlarımız üçün daha nəzərəçarpan etməyə nail oldum. Əlbəttə, biz öz öhdəliyimizi tam şəkildə yerinə yetirəcəyik. Bu tarixi fürsəti qaçırmamaq üçün Azərbaycanla məsləhətləşmələri davam etdiririk. Bu imkan əldən verilməyəcək. Çətinliklər olsa da, irəliləyirik”, – deyə Paşinyan bildirib.
Bu açıqlama Cənubi Qafqazda davam edən sülh prosesində mühüm mərhələ hesab olunur. Ekspertlər qeyd edirlər ki, hər iki tərəfin bu qədər yaxın bir nöqtəyə gəlməsi sülhün bərqərar olması üçün ümidverici siqnaldır.
Hazırda beynəlxalq ictimaiyyət Ermənistan və Azərbaycan arasında sülh sazişinin tezliklə imzalanacağına ümid edir.
