Özbəkistan Azərbaycanla Turizm Əməkdaşlığını Genişləndirir – Türk Dünyasında Yeni Təşəbbüs
Özbəkistan türkdilli dövlətlərlə, xüsusilə Azərbaycanla turizm sahəsində əməkdaşlığı genişləndirmək üçün fəal iş aparır. Bu barədə “Report”un Türkiyə bürosuna açıqlamasında Özbəkistan Turizm Nazirliyinin marketoloqu Şerzod Sultanov məlumat verib.
Nazirlik rəsmisinin sözlərinə görə, Azərbaycan və Özbəkistan mətbəxləri bir-birinə yaxın olduğu üçün mətbəx turizmi istiqamətində birgə təşəbbüslər nəzərdə tutulur. Hər iki ölkə dünyada öz ləziz və zəngin milli yeməkləri ilə tanınır.
“Mətbəx turizmdə əsas rol oynayır. Bundan əlavə, hər iki ölkə qədim tarixi, mədəni abidələri və çoxşaxəli mədəniyyəti ilə seçilir”, – deyə Sultanov qeyd edib.
O bildirib ki, keçən il Özbəkistanın turizm potensialının dünyada tanıdılması üçün müxtəlif beynəlxalq tədbirlər keçirilib və bu tədbirlərdə Azərbaycan nümayəndələri, xüsusilə media təmsilçiləri aktiv iştirak ediblər.
Bundan əlavə, Şerzod Sultanov qeyd edib ki, 2027-ci ildə Özbəkistanın bir şəhəri Türk dünyasının turizm paytaxtı elan olunacaq. Təklif Ankarada keçirilən Türk Dövlətləri Təşkilatının mədəniyyət və turizm nazirlərinin 10-cu toplantısında irəli sürülüb.
