Kamran İmanov: Ermənilərin istinad etdiyi mətnlərin orijinallığı yoxdur – saxtakarlıqlar ifşa olunur
Əqli Mülkiyyət Agentliyinin İdarə Heyətinin sədri Kamran İmanov, erməni saxtakarlıqları ilə bağlı mühüm açıqlama verib. O, aprelin 22-də Əqli Mülkiyyət Agentliyi və Qərbi Azərbaycan İcmasının birgə təşkilatçılığı ilə keçirilən “Qədim mətnlər və klassik mənbələr erməni saxtakarlıqlarını və uydurmalarını ifşa edir” mövzusunda konfransda çıxış edib.
Kamran İmanov bildirib ki, ermənilərin tez-tez istinad etdiyi əlyazmalar və tarixi mənbələrin əksəriyyəti ya orijinal deyil, ya da sonrakı dövrlərdə saxtalaşdırılmış nüsxələrdir. O qeyd edib ki, bu mətnlərin əsasında erməni mifologiyasına əsaslanan torpaq iddiaları və mədəni oğurluq faktları dayanır.
“Mifologiyaya əsaslanan ‘böyük erməni torpaqları’ stereotipi, ‘ilk sivilizasiya mərkəzi’, ‘böyük erməni mədəniyyəti’ kimi uydurma fikirlər, erməni ictimai şüurunda təbiilik və legitimlik qazandırılmağa çalışılır. Bu uydurmalar həm siyasətçilərin, həm də erməni cəmiyyətinin ümumi əxlaqına təsir göstərir,” – deyə Kamran İmanov vurğulayıb.
Konfransda diqqətə çatdırılıb ki, erməni tərəfinin tarixə saxta müdaxilələri və uydurma sənədlər üzərindən ərazi iddiaları beynəlxalq səviyyədə ifşa olunmalıdır. Məhz bu səbəbdən qədim mənbələrin araşdırılması və həqiqi tarixi faktların üzə çıxarılması xüsusi əhəmiyyət daşıyır.
