Fidan Əlizadə: “Yay Olimpiya Oyunlarında qızıl medal qazanmaq karyeramın ən böyük hədəfidir”
Azərbaycanlı cüdoçu Fidan Əlizadə karyerasının ən böyük hədəfinin Yay Olimpiya Oyunlarında qızıl medal qazanmaq olduğunu bildirib. O, bu fikrini Xorvatiyanın Dubrovnik şəhərində keçirilən böyüklər arasında cüdo üzrə Avropa Kubokundan sonra “Report”a verdiyi açıqlamada deyib.
Əlizadə qeyd edib ki, yarış onun üçün asan keçməsə də, məqsədinə çataraq çempion olmağı bacarıb:
“Yarış mənim üçün bir az ağır keçsə də, çempion ola bildim. Bu, böyüklər arasında ilk mükafatım idi. Turnirə yollananda da bir hədəfim var idi – çempion olmaq. Qarşıdan Avropa çempionatı gəlir və bu nəticə mənə böyük motivasiya verdi. Orada da əlimdən gələni edəcəyəm. Qızıl medal qazanmaq üçün var gücümlə çalışacağam. Karyeramda ən böyük hədəfim isə Yay Olimpiya Oyunlarında qızıl medal əldə etməkdir.”
Qeyd edək ki, Fidan Əlizadə 57 kq çəki dərəcəsində iştirak etdiyi Avropa Kubokunda bütün rəqiblərinə qalib gələrək qızıl medal qazanıb. Bu uğur onu qarşıdakı beynəlxalq yarışlar üçün daha da ruhlandırıb.
