KAAN qırıcı təyyarələrinin ixracı üzrə ilk müqavilə imzalandı – Türkiyə və İndoneziya arasında razılaşma
IDEF 2025 sərgisi çərçivəsində Türkiyə KAAN qırıcı təyyarələrinin ixracı üzrə ilk müqaviləni imzalayıb. Razılaşmaya əsasən, İndoneziyaya 48 ədəd KAAN təyyarəsi satılacaq.
Türkiyə İstanbulda keçirilən 17-ci Beynəlxalq Müdafiə Sənayesi Sərgisi (IDEF 2025) çərçivəsində KAAN qırıcı təyyarələrinin ixracı üzrə ilk müqaviləyə imza atıb. Bu barədə məlumatı Türkiyə Müdafiə Sənayesi Nazirliyi rəsmi şəkildə yayıb.
Razılaşmaya əsasən, İndoneziya Müdafiə Nazirliyi ilə imzalanan müqavilə çərçivəsində 48 ədəd KAAN qırıcı təyyarəsi bu ölkəyə ixrac olunacaq. KAAN, Türkiyənin ilk milli istehsalı olan beşinci nəsil qırıcı təyyarədir və ölkənin müdafiə sənayesində böyük əhəmiyyət daşıyır.
Bu müqavilə Türkiyə müdafiə sənayesinin beynəlxalq səviyyədə artan nüfuzunu və ixrac gücünü göstərən mühüm addım kimi qiymətləndirilir. İDEF 2025 sərgisi isə həm Türkiyənin, həm də digər ölkələrin hərbi texnologiyalarını tanıtmaq baxımından əhəmiyyətli platforma rolunu oynayır.
Qeyd edək ki, KAAN layihəsi ilə Türkiyə öz hərbi aviasiya sektorunu gücləndirməklə yanaşı, strateji tərəfdaş ölkələrlə əməkdaşlığını da genişləndirir.
