Rusiya “3+3” Formatını Cənubi Qafqazda Əməkdaşlıq və Təhlükəsizliyin Əsas Platforması Kimi Görür
Rusiya Federasiyası “3+3” əməkdaşlıq formatını Cənubi Qafqaz regionunda regional əməkdaşlığın və təhlükəsizliyin inkişafı üçün strateji alət kimi qiymətləndirir. Bu barədə Rusiya Xarici İşlər Nazirliyinin MDB ölkələri üzrə IV departamentinin direktor müavini Dmitri Masyuk “Maşuk” bilik mərkəzində keçirilən Qorçakov Fondunun “Qafqaz dialoqu” elmi-təhsil proqramının açılışında çıxışı zamanı bildirib.
Dmitri Masyukun sözlərinə görə, “3+3” formatı (Azərbaycan, Ermənistan, Gürcüstan + Rusiya, Türkiyə, İran) region ölkələri arasında qarşılıqlı maraq doğuran sahələrdə harmonik və ardıcıl əməkdaşlığın qurulması üçün mühüm platforma rolunu oynayır. O qeyd edib ki, bu model gələcəkdə Avrasiya təhlükəsizlik arxitekturasının əsas dayaqlarından biri kimi nəzərdən keçirilə bilər.
“Əminik ki, qapıları açıq qalan Gürcüstan da daxil olmaqla, bütün region ölkələrinin bu formatda aktiv iştirakı Cənubi Qafqazın rifahı və sabitliyi üçün mühüm töhfə verəcək”, – deyə o bildirib.
