Qırğızıstanda Dövlət Çevrilişinə Cəhdin Qarşısı Alınıb – Təfərrüatlar Açıqlanıb
Qırğızıstanda dövlət çevrilişi məqsədi ilə kütləvi iğtişaşların təşkilinə cəhd edilib. Ölkənin Milli Təhlükəsizlik üzrə Dövlət Komitəsi (MTK) tərəfindən verilən məlumata görə, çevrilişi planlaşdıran şəxslər ictimai-siyasi sabitliyi pozmaq, millətlərarası ədavəti qızışdırmaq və hüquq-mühafizə orqanlarına qarşı təxribatlar törətmək niyyətində olublar.
MTK bildirib ki, təxribatçılar əvvəlcə yerli münaqişələri alovlandırmaq və bunun fonunda etiraz aksiyaları və iğtişaşlar yaratmaqla dövlət çevrilişinə zəmin hazırlamaq istəyiblər. Onlar təxribat xarakterli videoçarx hazırlayaraq, həmin materialı sosial şəbəkələrdə paylaşmağı və gəncləri təhrik etməyi planlaşdırıblar.
Bundan başqa, təxribatçı qrupun bütün üzvləri müəyyən edilərək saxlanılıb, lakin qrupun ideoloji rəhbərlərindən biri ölkə xaricindədir və onun axtarışı davam etdirilir. Qeyd olunur ki, bu cəhdlərin məqsədi ötən ilki hadisələrin təkrarı və paytaxt Bişkekdə qarşıdurmaların baş verməsi olub.
Qırğızıstanın Milli Təhlükəsizlik Komitəsi əlavə edib ki, cinayətkar qrup hüquq-mühafizə əməkdaşlarına və vətəndaşlara qarşı da təxribatlar planlaşdırıb. Sözügedən fəaliyyətlərin bəziləri xaricdən idarə olunub.
