Azərbaycan Bakı şəhərində Rusiya-Ukrayna danışıqlarına ev sahibliyi etməyə hazırdır – Hikmət Hacıyev
Azərbaycan Prezidentinin köməkçisi Hikmət Hacıyev bildirib ki, Bakı Rusiya və Ukrayna arasında sülh danışıqlarının keçirilməsi üçün bütün lazımi şəraiti təmin etməyə hazırdır.
Azərbaycan Rusiya və Ukrayna arasında mümkün sülh danışıqlarına ev sahibliyi etmək üçün Bakıda bütün lazımi şəraitin mövcud olduğunu bəyan edib. Bu barədə Azərbaycan Prezidentinin köməkçisi, Prezident Administrasiyasının Xarici siyasət məsələləri şöbəsinin müdiri Hikmət Hacıyev Almaniyanın “Berliner Zeitung” nəşrinə verdiyi müsahibədə bildirib.
Hikmət Hacıyev vurğulayıb ki, Bakı artıq beynəlxalq səviyyəli diplomatik tədbirlərə uğurla ev sahibliyi edən şəhər kimi tanınır:
“Əgər dostlarımız və tərəfdaşlarımız – Rusiya və Ukrayna – Bakıda görüşmək istəsələr, biz onları qəbul etməyə çox şad olarıq.”
O, qeyd edib ki, Bakı Xəzər regionunun diplomatik paytaxtı statusunu qazanıb. Burada daha əvvəl Türkiyə və İsrail, Suriya və İsrail, Rusiya və ABŞ, eləcə də Rusiya və NATO arasında mühüm danışıqlar aparılıb.
Azərbaycan rəsmisi əlavə edib ki, Bakı hər kəsi qəbul etməyə hazırdır, lakin tərəflərin öz təşəbbüsü ilə bu danışıqlara qərar verməsi vacibdir:
“Biz heç kimi məcbur edə bilmərik. Onlar özləri bizə müraciət etməlidirlər.”
Bu bəyanat Azərbaycan rəhbərliyinin beynəlxalq sülh və diplomatiya təşəbbüslərində aktiv iştirak etməyə davam etdiyini və Bakı şəhərinin qlobal diplomatik platforma kimi rolunun gücləndiyini göstərir.
