Rusiya İstintaq Komitəsi: Moskva Maliyyə Universitetində azərbaycanlı tələbələrin şüarlarında ekstremizm aşkarlanmadı
Azərbaycanlı tələbələrə qarşı ittihamlar saxta çıxdı
Rusiya İstintaq Komitəsi, Moskva Maliyyə Universitetində azərbaycanlı tələbələrin “Yaşasın Azərbaycan!” şüarlarının ekstremizmə dair heç bir sübutunun olmadığını açıqlayıb. İstintaq Komitəsinin rəsmi nümayəndəsi Svetlana Petrenko bildirib ki, “tərcüməçi ilə birlikdə videoyazılar araşdırılıb və ekstremist xarakterli çağırışlara rast gəlinməyib”.
Hadisənin təfərrüatı
Məlum olub ki, hadisə noyabrın 14-də universitetdə keçirilən “Mənim vətənim: böyük və kiçik” adlı festivaldan sonra baş verib. Festivalın sonunda azərbaycanlı tələbələr Azərbaycan bayraqları ilə “Yaşasın Azərbaycan” şüarları səsləndiriblər. Bu anlar videoya çəkilərək sosial mediada paylaşılıb.
Feyk xəbərlərin yayılması
Noyabrın 16-da bəzi Rusiya millətçi Teleqram kanalları həmin videoda azərbaycanlı tələbələrin guya “Allahu Əkbər” və “Rusları qırın” kimi şüarlar səsləndirdikləri barədə yanlış məlumatlar yayıblar. Bu feyk xəbərlər sosial şəbəkələrdə sürətlə yayılaraq böyük qalmaqal yaradıb.
İstintaq Komitəsinin qərarı
Rusiya İstintaq Komitəsi iddialarla bağlı cinayət işi açsa da, araşdırma nəticəsində tələbələrin qanunsuz hərəkətlərə yol vermədiyi müəyyənləşib. Prosesin sonunda müvafiq hüquqi qərar veriləcək.
