Litva Ukraynaya “Patriot” raket sistemlərinin alınması üçün 30 milyon avro ayıracaq
Litva hökuməti Ukraynaya dəstək məqsədilə növbəti mühüm addım atıb. Vilnüs “Patriot” zenit-raket komplekslərinin alınması üçün 30 milyon avro maliyyə vəsaiti ayıracaq. Bu barədə Litva Müdafiə Naziri Dovile Şakalene BNS agentliyinə açıqlamasında məlumat verib.
Nazirin sözlərinə görə, Litva ABŞ istehsalı olan “Patriot” sistemlərinin alınması prosesinə qoşulacaq və bu məqsədlə təxminən 30 milyon avro büdcədən ayrılacaq. O, həmçinin qeyd edib ki, bu addım ABŞ Prezidenti Donald Trampın qərarını dəstəkləmək məqsədi daşıyan strateji bir mesajdır.
“Litva ABŞ-də istehsal olunan silahların, konkret olaraq “Patriot” sistemlərinin alınmasına qoşulacaq. Bununla biz ABŞ-ın mövqeyini və Ukraynaya dəstəyini gücləndiririk,” – deyə Dovile Şakalene əlavə edib.
Bu qərar, həmçinin Litvanın NATO müttəfiqləri ilə koordinasiyalı şəkildə Ukraynaya davamlı hərbi və texniki dəstək göstərmək niyyətinin bir hissəsidir. “Patriot” sistemləri, Ukraynanın hava hücumundan müdafiə imkanlarını artırmaq baxımından xüsusi əhəmiyyət daşıyır.
