ABŞ 2027-ci ildən etibarən UNESCO-dan Rəsmi Olaraq Çıxacaq
ABŞ 2026-cı ilin sonunda UNESCO-dan rəsmi şəkildə çıxacaq. Dövlət Departamenti bu qərarı ABŞ xarici siyasət prinsipləri və UNESCO-nun ideoloji gündəmi ilə bağlı fikir ayrılığı ilə əsaslandırıb.
ABŞ 2027-ci ildən etibarən UNESCO-dan rəsmi olaraq çıxacaq. Bu barədə məlumatı “Report” xəbər agentliyi yayıb.
ABŞ Dövlət Departamentinin açıqlamasına görə, UNESCO-dan çıxış prosesi 2026-cı il dekabrın 31-də tamamlanacaq. Birləşmiş Ştatlar artıq təşkilatın rəhbərliyini bu qərar barədə rəsmi şəkildə məlumatlandırıb.
Məlumatda qeyd olunub ki, UNESCO-nun ideoloji gündəmi və “Fələstin Dövləti”ni üzv dövlət kimi tanıması ABŞ-ın xarici siyasətinə ziddir:
“UNESCO cəmiyyətdə fikir ayrılığı doğuran sosial və mədəni problemlərin həlli ilə məşğuldur və bu, BMT-nin Dayanıqlı İnkişaf Məqsədlərinə uyğun olsa da, ABŞ-ın ‘Amerika hər şeydən öndə’ prinsipi ilə uzlaşmır. Eyni zamanda, UNESCO-nun Fələstini üzv kimi qəbul etməsi anti-İsrail ritorikasının yayılmasına səbəb olub və bu, ABŞ siyasətinə ziddir”, – deyə açıqlamada bildirilir.
Qeyd edək ki, bu qərarın ABŞ Prezidenti Donald Tramp tərəfindən qəbul edildiyi daha əvvəl bəlli olmuşdu. Bu addım ABŞ-ın beynəlxalq təşkilatlara münasibətində dəyişikliklərin davam etdiyini göstərir.
