Azərbaycanda Yaşıl Texnologiyalara Əsaslanan Yeni Data Mərkəzləri
Abşeron və Hacıqabulda tikiləcək yeni data mərkəzləri karbon emissiyalarını minimuma endirən innovativ texnologiyalarla inşa ediləcək. “AzInTelecom” tərəfindən idarə olunacaq mərkəzlər yaşıl texnologiyalara əsaslanır və beynəlxalq keyfiyyət sertifikatlarına malikdir.
Azərbaycan Abşeron və Hacıqabul rayonlarında yaşıl texnologiyalara əsaslanan, karbon emissiyalarını azaldan iki yeni data mərkəzi tikəcək. Bu mərkəzlər Azərbaycan Respublikası Rəqəmsal İnkişaf və Nəqliyyat Nazirliyinə bağlı olan “AzInTelecom” MMC-nin balansında olacaq.
Mərkəzlərin inşasında enerji səmərəliliyi, tullantıların utilizasiyası, təbii soyutma sistemləri və bərpa olunan enerji istifadəsi kimi qabaqcıl texnologiyalar tətbiq ediləcək. Günəş panellərinin quraşdırılması nəticəsində karbon emissiyası minimuma endiriləcək.
Artıq hər iki mərkəz beynəlxalq “TIER 3 Design” sertifikatı alıb və ekoloji dayanıqlılığı təsdiqləyən “LEED v4” sertifikatı üçün ilkin tələbləri yerinə yetirib. Şirkət tikinti zamanı ətraf mühitə təsirləri azaltmaq məqsədilə torpaq eroziyası və su çirklənməsi ilə mübarizə tədbirlərini də planlaşdırıb.
AzInTelecom, həmçinin BMT-nin Dayanıqlı İnkişaf Məqsədlərinə uyğun fəaliyyət göstərməyi və ekoloji idarəetmə prinsiplərini gücləndirməyi hədəfləyir. Şirkət hazırda 200-dən çox dövlət qurumu və özəl şirkətə “bulud” xidmətləri təqdim edir və Cənubi Qafqazda TIER 3 sertifikatına malik ilk bulud provayderidir.
