Türkiyə 47 İllik Terror Bəlasına Son Qoyur: PKK Silahları Təhvil Verdi
Türkiyə Prezidenti Rəcəb Tayyib Ərdoğan açıqlayıb ki, PKK-nın silahları təhvil verməsi ilə Türkiyə 47 illik terror bəlasından xilas olmağa başlayıb. Ətraflı məlumat üçün oxuyun.
Türkiyə Prezidenti Rəcəb Tayyib Ərdoğan bildirib ki, Türkiyə 47 illik terror bəlasından PKK-nın silahları təhvil verməsi ilə xilas olmağa başlayıb.
“Report” xəbər verir ki, bu fikirləri Prezident Ərdoğan AK Partiyanın 32-ci “Məsləhətləşmə və Dəyərləndirmə” toplantısında səsləndirib. O, iyulun 11-də İraqın şimalında, Süleymaniyə şəhərində keçmiş PKK terror təşkilatı tərəfdarlarının silahlarını təhvil verməsinə münasibət bildirib.
Ərdoğanın sözlərinə görə, 15 iyul dövlət çevrilişi cəhdindən sonra Türkiyə terrorla mübarizədə yeni bir mexanizm qurub:
“Terrorun qarşısına keçdik. İttifaq ortağımız Dövlət Baxçalının da çağırışı ilə ‘Terrorsuz Türkiyə’ üçün ciddi addımlar atdıq. Çox həssas və təmkinli bir prosesi idarə etdik. Dünən PKK terror təşkilatı aldığı qərarı həyata keçirərək silahlarını təhvil verdi.”
Rəcəb Tayyib Ərdoğan vurğulayıb ki, bu gündən etibarən Türkiyə üçün yeni tarixi səhifə açılıb və ölkənin yeni yüzilliyinin qapıları aralanıb:
“Hər kəs əmin olsun ki, Türkiyənin qüruruna heç kim toxuna bilməz. Cənab Dövlət Baxçalı və onun heyətinin vətənpərvərliyini sorğulamaq heç kimin həddinə deyil. Dövlət Baxçalı ilə birlikdə terrorsuz Türkiyə üçün canımızı ortaya qoymuşuq. Addımlarımız ancaq Türkiyənin xeyrinə hesablanıb.”
Prezident Ərdoğan əlavə edib ki, Türkiyə bundan sonra da millətin təhlükəsizliyi və istiqlalı üçün mübarizəni davam etdirəcək.
