MKİ-nin sabiq direktoru Con Brennan Konqresə yalan ifadə verməkdə ittiham olunur

ABŞ Mərkəzi Kəşfiyyat İdarəsinin (MKİ) keçmiş direktoru Con Brennan, Konqresə yalan ifadə verməkdə ittiham olunur.

Bu barədə “Breitbart News” məlumat yayıb. Xatırladaq ki, Brennan bu vəzifəni ABŞ-ın 44-cü prezidenti Barak Obama dövründə tutub.

İddiaların əsası nədir?

Daha əvvəl “New York Post” MKİ-nin Analiz direktorluğunun 2016-cı il ABŞ prezident seçkiləri ilə bağlı hesabatını dərc edib. Hesabatda göstərilir ki:

Rusiyanın seçkilərə mümkün müdaxiləsi ilə bağlı sənəddə çoxsaylı prosedur pozuntuları olub;
Hesabatda siyasi motiv daşıyan elementlərin olduğu qeyd olunub;
“Stilin dosyesi” adlı sənədin hesabatda yer alması Brennanın şəxsi təşəbbüsü ilə baş tutub.

“Stilin dosyesi” Böyük Britaniya kəşfiyyatının sabiq əməkdaşı Kristofer Stil tərəfindən tərtib olunub və Rusiya ilə Donald Tramp arasında guya sövdələşməni əks etdirən yalan məlumatlar ehtiva edib.

Bu sənədin hazırlanmasında “Fusion GPS”, Kristofer Stil və onun London şirkəti iştirak edib.

Konqresdə ziddiyyətli ifadə

Brennan isə Konqresin bağlı iclaslarında bu dosyenin hesabatda yer almasında rol oynamadığını iddia edib. Lakin MKİ-nin daxili sənədləri və analitik rəyləri bunun əksini sübut edir.

“Breitbart News” portalı Konqresdəki mənbəyə istinadla bildirib ki, Brennanın soyuqqanlılıqla yalan ifadə verməsi siyasətçiləri şoka salıb.