Türk Dövlətləri Ali Məhkəmələrinin Konfransı Antalyada Keçirildi – Azərbaycan nümayəndə heyəti iştirak etdi
İnam Kərimovun rəhbərlik etdiyi nümayəndə heyəti Antalyada Konfransda iştirak etdi
Azərbaycan Ali Məhkəməsinin sədri İnam Kərimovun rəhbərlik etdiyi nümayəndə heyəti Türk Dövlətləri Ali Məhkəmələrinin Konfransında iştirak etmək üçün Türkiyənin Antalya şəhərində səfərdə olub.
Konfrans çərçivəsində Türk Dövlətləri Ali Məhkəmələrinin Konfransının Əsasnaməsi təsdiq edilib. Bu sənəd türk dövlətləri arasında vahid hüquqi platformanın rəsmi əsaslarını müəyyən edir.
İnam Kərimov: “Bizim ailəmiz Türk dünyasıdır”
Çıxışında İnam Kərimov bildirib ki, bu formatda keçirilən görüşlər ortaq hüquqi irs və dəyərlər əsasında əməkdaşlığın möhkəmlənməsi baxımından mühüm əhəmiyyət daşıyır. O xatırladıb ki, bu təşəbbüsün əsası 2023-cü il 19 oktyabr tarixində Azərbaycanın Şuşa şəhərində imzalanmış Bəyannəmə dayanır.
Sədr, Prezident İlham Əliyevin “Bizim başqa ailəmiz yoxdur. Bizim ailəmiz Türk dünyasıdır” fikrini vurğulayaraq, bu birliyin daha da güclənəcəyinə inandığını bildirib.
Ədalət mühakiməsində şəffaflıq və səmərəlilik əsas prioritetdir
İnam Kərimov çıxışında bildirib ki, müasir dövrdə məhkəmə sistemlərinin qarşısında duran əsas vəzifələrdən biri – vətəndaşların ədalətə çıxış imkanlarının artırılması, şəffaf və çevik mühakimənin təmin olunmasıdır.
O, Azərbaycanda həyata keçirilən məhkəmə-hüquq islahatlarının bu məqsədlərə xidmət etdiyini xüsusi vurğulayıb.
Gənc hüquqşünaslar və hakimlər üçün yeni imkanlar
Çıxışda gənc hüquqşünasların və hakimlərin hazırlanması, beynəlxalq təcrübənin öyrənilməsi və tətbiqi məsələləri gündəmə gətirilib. Həmçinin təklif edilib ki, gələcək konfranslarda ədalət mühakiməsi sahəsində qarşılıqlı müzakirələr, məhkəmə qərarlarının müqayisəsi və vahid hüquqi təcrübənin formalaşdırılması istiqamətində panellər təşkil olunsun.
Əməkdaşlıq görüşləri keçirilib
Səfər çərçivəsində İnam Kərimov Türkiyə Ali Məhkəməsinin sədri Ömər Kərkəz və Ali İnzibati Məhkəmənin sədri Zeki Yiğit ilə görüşlər keçirib. Görüşlərdə iki ölkə arasında məhkəmə-hüquq sahəsində əməkdaşlıq perspektivləri müzakirə olunub.
