ABŞ və İran arasında nüvə sazişi Yaxın Şərqdə sülhə töhfə verə bilər – AEBA
ABŞ və İran arasında Tehranın nüvə proqramı ilə bağlı sazişin imzalanması Yaxın Şərq regionunda sülh və sabitliyə dərhal müsbət təsir göstərəcək.
Bu barədə Atom Enerjisi üzrə Beynəlxalq Agentliyin (AEBA) baş direktoru Rafael Qrossi AEBA-nın Rəhbərlər Şurasının iclasında çıxışı zamanı bildirib. Onun sözlərinə görə, diplomatik yanaşma və yoxlama mexanizmləri bu prosesdə əsas rol oynayır.
“Əminəm ki, irəliləməyin yeganə yolu AEBA-nın yoxlama mexanizminə əsaslanan diplomatik həll yoludur. Mən ABŞ və İranı səylərini davam etdirməyə, müdriklik və siyasi cəsarət göstərməyə çağırıram. İranın nüvə proqramı ilə bağlı vəziyyətin sabitləşməsi dərhal təsir göstərəcək və Yaxın Şərqdə sülh və inkişaf üçün mühüm addım olacaq”, – deyə Qrossi vurğulayıb.
Mütəxəssislərin fikrincə, belə bir razılaşma yalnız İranın nüvə ambisiyalarını məhdudlaşdırmaqla kifayətlənməyəcək, həm də regionda genişmiqyaslı təhlükəsizlik və diplomatik əməkdaşlığa təkan verəcək.
