ABŞ və İran arasında Tehranın nüvə proqramı ilə bağlı dolayı danışıqlar çətin keçib
Əsmail Baqai: Danışıqlar gərgin olsa da, qarşılıqlı mövqeləri anlamaq baxımından faydalı oldu
ABŞ və İran arasında Tehranın nüvə proqramı ilə bağlı Omanda keçirilən dolayı danışıqlar çətin keçib. Lakin tərəflər bir-birlərinin mövqelərini anlamağa və fikir ayrılıqlarını azaltmağa bir addım daha yaxınlaşıblar.
“Report”un məlumatına görə, bu barədə İran Xarici İşlər Nazirliyinin rəsmi nümayəndəsi Əsmail Baqai “X” sosial şəbəkəsində paylaşım edib.
Omanda 4-cü raund başa çatdı
Əsmail Baqai bildirib:
“Omanda ABŞ və İran arasında dördüncü raund dolayı danışıqlar başa çatdı, çətin oldu. Lakin bir-birilərinin mövqelərini daha yaxşı anlamaq və fikir ayrılıqlarının həlli üçün məqbul və real yollar axtarmaq baxımından faydalı danışıqlar oldu.”
O qeyd edib ki, növbəti məsləhətləşmə raundunu Oman tərəfi əlaqələndirəcək və danışıqların keçiriləcəyi vaxt ayrıca açıqlanacaq.
Nüvə danışıqları davam edir
Bu danışıqlar, İranın nüvə proqramı ətrafında yaranan beynəlxalq narahatlıqların aradan qaldırılması və regional sabitliyin təmin olunması məqsədilə mühüm əhəmiyyət daşıyır.
